Ильяз Андаш, Добр жана Кайрат Примбердиев чачын таз кылып алдырышты. Эми кезек кимде?

Ырчылар Ильяз Андаш, Добр, Кайрат Примбердиев, шоумен Манас Алыкулов чач жасалгасын өзгөртүштү. Алар чачын таз кылып алдыруу эстафетасын бири-бирине узатышууда.

Ырчы Ильяз Андаш SUPER.KG порталына акыркы жолу 5-класста чачын кырдырып салганын айтты.

"Башым эс алсын деп кырдырып салууну ойлонуп жүргөм. Орозо айында чакыруулар дээрлик болбойт эмеспи. Ушул айда кырып салууну туура көрдүм. Досторго да эстафета узатып койгом. Кечээ футбол ойногону барганда алар да чачын алдырганын көрдүм. Өскөн чачты кайра эле алдырып жатам. Башкалар көнбөгөн үчүн баары эле жарашпаганын айтып жатышат" дейт ырчы.

Ал чачын таз кылып алдырууну Курал Чокоев, Манас Алыкулов, Кайрат Примбердиев, актёр Анвар Осмоналиев жана башка досторуна сунуштаган.

Ильяз Андаштын эстафетасын кабыл алган рэп ырчысы Добр буга чейин деле кырдырып жүргөнүн айтат.

"Өзүм мурун эле чачымды кырдырып же кыска алып жүргөндүктөн көп айырмачылык болгон жок", - деди ал.

Ырчылардын футбол оюнунан кийинки сүрөттөрүнө пикир жазган окурмандары таң калышканын билдиришкен.