Ысык-Көлдө бир туугандар ойноп жатып муздаткычтын ичинде камалып калып, тумчугуп каза болуп калышкан

Ысык-Көл облусунун Түп районунда 6 жана 4 жаштагы бир тууган ага-ини ойноп жатып эски муздаткычтын ичинде камалып калып, тумчугуп каза болуп калышты. Бул тууралуу SUPER.KG порталына облустук милициядан билдиришти.

Маалыматка ылайык, окуя 3-июнь күнү Түп районунун Михайловка айылында болгон.

"Саат 11:55 чамасында эки бир тууган үйдүн короосунда ойноп жатып дайынсыз жоголуп кетишкен. Мындан улам балдардын ата-энеси милицияга кайрылышкан. Балдарды издөө иштери кечке чейин болуп, бирок алар табылган эмес. Саат 17:00дө үйдүн короосунда турган эски муздаткычты ачып көрүшкөндө балдар муздаткычтын ичинде болгон. Алар ойноп жатып муздаткычтын ичине камалып калып, тумчугуп калышкан. Ал муздаткыч сырттан гана ачыла турганы аныкталган. Учурда бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынды. Ошондой эле соттук-медициналык экспертизалар дайындалды", - деп билдирет басма сөз кызматы.

Ысык-Көл ОИИБи социалдык тармакта бул окуя боюнча тарап кеткен видеону ким таратканын аныктап жатышат.