Белгилүү актёр Сүймөнкул Чокморовдун 80 жылдыгына карата кино кербен башталды

Сүймөнкул Чокморовдун 80 жылдыгына карата өлкө боюнча кино кербен башталды. Бул тууралуу Кинематографияны өнүктүрүү фондунан билдиришти.

Маалымат ылайык, кино кербендин ачылышы Таласта бүгүн, 21-июнь күнү өтүүдө. Анда Сүймөнкул Чокморов тартылган тасмалар – Болот Шамшиевдин "Караш-Караш окуясы" жана Төлөмүш Океевдин "Улан" аттуу тасмалары көрсөтүлөт. Кино кербен өлкө боюнча өтүп, 9-ноябрь күнү Бишкек шаарында аяктайт.

Кыргыз киносунун тарыхында “Эң мыкты эркек актёр” наамын 4 жолу алган жалгыз актёр жана даңазалуу сүрөтчү Сүймөнкул Чокморов 1939-жылы 9-ноябрда Чүй облусуна караштуу Аламүдүн районунун Чоң-Таш айылында туулган. Замандаштарынын айтымында, Сүймөнкул Чокморовдун мүнөзү токтоо, боорукер, антка бекем, айкөл, кыргыздын каада-салтын бекем сактаган адам болгон. Ошондой эле актёр мыкты ырдап, комузда жана домбрада ойной билген. Сүймөнкул Чокморов - көркөм сүрөт жана графика жанрындагы 800гө жакын чыгарманын автору.