Журналист Нуржан Ташболот кызы Мирбек Атабековду иш-чарага келбей койду деп айыптады. Ырчы окуянын чоо-жайын айтып берди

Журналист Нуржан Ташболот кызы социалдык тармактагы баракчасына Кыргыз Республикасынын Эмгек сиңирген артистине нааразы болгон билдирүүсүн калтырды. Анда Нуржан айым Эмгек сиңирген артист Мирбек Атабековду иш-чарага чакырганын айтат. Бирок ырчы эскерткенден кийин 3 саат күттүрүп келбей койгон. Мындан улам бир нече жолу продюсерине байланышып, ырчы менен сүйлөшө албай койгонун билдирген. Журналист Мирбек Атабеков эл аралык иш-чарага чакыруу алганына карабай жоопкерчиликсиз мамиле кылганын айтат.

Ал эми бул боюнча Мирбек Атабековго байланышып, окуянын чоо-жайын уктук.

"Ал эже мени иш-чарага саат 17:00гө чакырып, макулдашканбыз. Кечинде "саат 14:00гө кел" деген СМС билдирүү жазып жибериптир. Мен шаарда эместигимди, жетишпей каларымды, саат 17:00гө барарымды айттым. Бирок менин билдирүүмө эч кандай жооп жазган жок. Чакырып жаткан адам бир убакытты айтышы керек болчу да. Мага эч нерсе деп айтпагандыктан барган эмесмин. Болгону ошол", - дейт ырчы.