Бишкек-Кемин трассасында автокырсык болуп, 12 киши жаракат алды

3-августта Чүйдүн Ысык-Ата районунда, тактап айтканда, Бишкек-Кемин унаа жолунун 5 чакырымында 4 унаа катышкан жол кырсыгы катталды. Бул тууралуу Чүй ОИИБинин басма сөз кызматы билдирет. Бул күнү саат 13:30 чамасында  Бишкек шаарынын 18 жаштагы тургуну К.Константин башкарып бара жаткан Тойота Королла унаасы Мерседес Спринтер кичи автобусу менен сүзүшкөн. Окуядан мындан башка да 2 унаа жабыркаган. Кырсыктан каза болгондор жок, 12 адам жаракат алды. Анын ичинен экөөсү жаш бала. Учурда кырсыктын келип чыгуу себептери такталууда.