Кыргыз чек ара кызматынын башчысы Баткенге учуп кетти

Кыргыз-Тажик чек арасында бүгүн, 23-июлда саат 7:30га карата маалымат боюнча абал салыштырмалуу туруктуу. Бул тууралуу Чек ара кызматынын басма сөз кызматы билдирди.

"Ок атышуу токтотулду. Чек арачылар күчөтүлгөн режимде иштеп жатат. Исфара-Ворух унаа жолу жабылган бойдон калууда. Кыргыз жана Тажик чек арачылары, укук коргоо органдары, жергиликтүү бийлик өкүлдөрү жаңжалдын алдын алуу боюнча иш-аракеттерди көрүшүүдө. Кыргыз чек ара кызматынын башчысы Уларбек Шаршеев Баткен облусуна учуп кетти", - деп айтылат маалыматта.

22-июлда Ак-Сай айылынын тургундары менен Ворух анклавынын жашоочуларынын ортосунда пикир келишпестик орун алган. Уруш учурунда жарандардын бири курал колдонуп ок чыгарган. Саламаттыкты сактоо министрлигинин басма сөз кызматы жаңжалдан 8 адам жабыркаганын, экөөсүнө операция жасалганын кабарлаган. Ак-Сай айылынын жашоочусу болсо 11 адам жабыркап, алардын тогузу октон жаракат алганын айтты. Жаңжал боюнча Кыргыз жана Тажик Чек ара кызматы да билдирүү таратты. Тажикстан тарап жаңжалдан 1 адам каза болуп, 10дон ашуун адам жаракат алганын маалымдады.