Солтон-Сарыда миңге чукул эл чогулду. Алар өкмөт өкүлдөрүнө талаптарын койду

Бүгүн, 6-августта саат 17:00гө карата Солтон-Сары кенинде 700-800дөй адам чогулду. Алар кен казган кытай компаниясынын кызматкерлеринин чыгып кетүүсүн талап кылып жатканын жеринде жүргөн кабарчыбыз билдирди.

Вице-премьер-министр Кубатбек Боронов өкмөттүн Нарын облусундагы ыйгарым укуктуу өкүлү Аманбай Кайыпов жергиликтүү тургундар менен сүйлөшүп, алардын талабын укту.

Эл өкмөт өкүлдөрүнө эки талап койду. Алар:

1. Алтын кенин иштеткен "Жоңжи майниң" ("Zhong Ji Mining") кытай компаниясынан лицензияны алуу;

2. Азыркы Нарын районунун акимин, өкмөттүн ыйгарым укуктуу өкүлүн кызматтан алуу.

Эл бул талаптардын жообун күтүп жатышат. Эгер коюлган талаптар бүгүн аткарылбаса Бишкек-Нарын-Торугарт жолун жабарын айтышты. Ошондо гана өкмөт башчы Мухамедкалый Абылгазиев келип, маселени чечет деп күтүшүүдө. Анткени эл менен жолуккан бийлик өкүлдөрү маселени өкмөт чечерин айтышкан.

Ошондой эле, жергиликтүү тургундар кенди иштетип жаткан компаниянын кызматкерлеринин чыгып кетүүсүн, өздөрү менен кошо техникаларын алып кетишин талап кылышты.

Учурда кытай компаниясынын бир дагы жумушчусу калган жок. Аларды Бишкекке, Кочкорго алып кетишти.