"Палоо сенден, шарап бизден!". Беларусь президенти Курманбек Бакиевди 70 жылдык юбилейи менен куттуктады

Беларусь президенти Александр Лукашенко Курманбек Бакиевге "палоо сенден, шарап бизден" деди. Бул тууралуу ал Курманбек Бакиев менен жолугушуу учурунда айтты. Жолугушуу бүгүн, 6-августта болгонун өлкө башчынын расмий сайты жарыялады.

"Алардын жолугуп, сүйлөшүүсүнө Курманбек Бакиевдин бир нече күн мурда белгилеген 70 жылдык юбилейи себеп болду. Беларусь лидери эгемендүүлүк сарайында Бакиевди кабыл алып, көчмөндөрдүн бүркүт менен аңчылыкка чыкканы тартылган картинаны белекке берди. Ошондой эле Александр Лукашенко юбилей ээсине кортик (ичке канжар) жана букет тартуулады. Курманбек Бакиев белек үчүн ыраазычылыгын билдирди", - деп жазылат маалыматта.

Александр Лукашенко менен Курманбек Бакиевдин сүйлөшүүсүнөн кыскача үзүндү.

- "Бул менин өлкөм го... Жылкылар, бүркүттөр..." деген картинаны көргөн Бакиев.

- "Сенин өлкөң жана сенин чөйрөң. Бул сыймыктуу куш сага окшош" деген Лукашенко.

- "Биз, баарыбыз сенин туулган күнүңө барабыз. Сен бизге кыргыздын палоосун жасап бересиңби? Палоо сенден, шарап бизден болсун!" деген Александр Лукашенко.

Курманбек Бакиев меймандарын кубануу менен тосуп алып, палоону өзү даярдай турганын айткан.

"Сенин юбилейиңдин урматы үчүн бүгүн бизде Беларусь-Кыргыз достук күнү" деди Лукашенко. Куттуктоонун аягында алар актуалдуу маселелер боюнча сүйлөштү.

Курманбек Бакиевдин Минск шаарында өткөн 70 жылдык юбилейинде өзбекстандык "Ялла" тобу ырдаганы социалдык тармакта кызуу талкууга алынган.