Башкы прокуратура Кой-Таштагы башаламандыктан 22 спецназ жана ИИМдин 2 кызматкери жаракат алганын билдирди

7-августта Алмазбек Атамбаевдин тарапташтары менен күч түзүмдөрүнүн кызматкерлеринин ортосунда чыккан жаңжалдан жалпысынан 46 адам жаракат алып, 1 спецназ каза болду. Бул факты Кылмыштардын жана жоруктардын бирдиктүү реестрине 264-берене (массалык башаламандык) жана 266-берене (бейбаштык) менен катталып, сотко чейинки өндүрүшкө алынды.

Кыргыз Республикасынын Башкы прокуратурасынын бүгүн саат 8:00гө карата берген маалыматында жаракат алгандардын 22си УКМКнын атайын даярдыктагы жоокерлери болгон. 1 жабырлануучу Ички иштер министрлигинин кызматкери, дагы бирөө Чүй ОИИББинин башчысы. Ал эми калган 23 адам Атамбаевдин тарапташтары.

Алмазбек Атамбаевди кармоо операциясында атайын даярдыктагы жоокерлердин тарапташтар тарабынан кармалышы боюнча факт Кылмыштардын жана жоруктардын бирдиктүү реестрине 244-берене (барымтага алуу) менен катталып, сотко чейинки тергөө амалдары башталды.