Уюшкан кылмыштуулукка каршы күрөшүү бөлүмүнүн башчысы жол талашкан жаранга карата ок чыгарды

Бишкекте милиция кызматкери 25 жаштагы жигитке карата ок чыгарды. Алардын ортосунда жол талашуудан улам чыр чыкканын Бишкек ШИИББинин маалымат кызматынан билдиришти.

"9-октябрда эртең мененки саат 08:20 чамасында нөөмөт бөлүмүнө Масалиев жана Алымкулов көчөлөрүнүн кесилишинде жаңжал болуп жатат деген билдирүү түшкөн. Окуя болгон жерге милиция кызматкерлери барып, чырдын себебин аныкташкан. Анда айдоочулар жол талаша кетип, Тойота Камри үлгүсүндөгү унаанын айдоочусу өзүн милиция кызматкери, Бишкек ШИИББинде уюшкан кылмыштуулукка каршы күрөшүү бөлүмүнүн жетекчиси Нурлан Амангулов деп тааныштырган. Милиция кызматкери жол талашкан жаранга шашып жатканын билдирген. Ал эми 25 жаштагы А.Ж. аттуу жаран Тойота Ремикс үлгүсүндөгү унаасынан чыгып, милиция кызматкеринин суранычын канааттандырбай, айтыша кеткен. А.Ж. колуна белгисиз каражатты алып, милиция кызматкери Амангуловдун бетине уруп, өмүрүнө коркунуч жарата турган кыймыл-аракеттерди баштаган. Милиция кызматкери өзүнүн коопсуздугу үчүн тапанчасын алып чыгып, асманга ок чыгарган. Бирок А.Ж. милиция кызматкерине асылганын токтоткон эмес. Мындан улам Нурлан Амангулов А.Ж. тарапка экинчи жолку ок чыгаруудан кийин А.Ж. унаасына отуруп, белгисиз тарапка кеткен.

Тергөө иштеринин алкагында А.Ж. Бишкектеги Травматология жана илим изилдөө борборуна кайрылган. Анын сол колуна ок тийгени маалым болгон. Мындан тышкары, ал Ленин РИИБине арыз менен кайрылган.

Бул факты Кылмыштардын жана жоруктардын бирдиктүү реестрине "бейбаштык" беренеси менен катталып, сотко чейинки өндүрүш иши башталды. Учурда тийиштүү экспертизалар дайындалып, тергөө амалдары улантылып жатат", - дешти басма сөз кызматынан.