Ошто кылмыш чөйрөсүндө "Казак" каймана аты менен белгилүү болгон жаран кармалды

Ош шаарында кылмыш чөйрөсүндө "Казак" каймана аты менен белгилүү М.У. аттуу жаран кармалды. Бул тууралуу Ош ШИИБинин басма сөз кызматынан билдиришти.

Маалыматка ылайык, 9-октябрь күнү Ош шаарынын "Скай-бар" түнкү эс алуу борборунда Ош шаарынын 23 жаштагы тургуну менен шектүү сөз талаша кетишкен. Мындан улам ал 23 жаштагы жаранды миздүү нерсе менен желкесине жана оң каруусуна сайып, андан ары изин жашырып кеткен. Кылмышка шектүү М.У. кечээ, 10-октябрда кармалып, Ош шаардык ички иштер башкармалыгына алып келинген. Жазык процессуалдык кодексинин 98-беренесине ылайык, 48 саатка кармоо чечими чыгарылган.

Бирок сурак учурунда ал өзүн начар сезгендигине байланыштуу жактоочусу тарабынан "Тез жардам" чакырылып, Ош шаарындагы ооруканалардын бирине жаткырылды. Милиция кызматкерлери тарабынан шектүү кайтарууга алынды.

Шектүү буга чейин бир нече жолу соттолгон.

Ош ШИИБи кимде ким ушул "Казак" каймана аты бар, ИИМде "уюшкан кылмыштуу топтун активдүү мүчөсү" катары каттоосунда турган жарандан жабыркагандар болсо төмөнкү номерлерге байланышууну өтүнөт.

Байланыш телефону: 03222-2-46-78.