Аида Салянова: "Алмазбек Атамбаевге каршы көрсөтмө бердим деп эсептейм"

Мурдагы башкы прокурор Аида Салянова мурдагы президент Алмазбек Атамбаевге каршы көрсөтмө бергенин бүгүн, 15-октябрда Бишкектеги Биринчи Май райондук сотунда билдирди.

Салянова райондук сотто Батукаевдин иши боюнча эмес, инисинин өлүмү боюнча процессте жүргөнүн да айтты.

"Мен Алмазбек Атамбаевге каршы көрсөтмө бердим деп эле эсептейм. Бул иште күнөөлүү адам жоопко тартылышы керек. Себеби күнөөлүү адамдын артынан канча адам жабыр тартты. Демек, жооп бериш керек. Батукаевдин иши боюнча Алмазбек Атамбаев менен беттешкенде ал адам мага каршы эч нерсе айта алган жок. Алдыда да айта албайт деп ойлойм", - деди Салянова.

Ушул жылдын 3-июнунда Аида Салянова Азиз Батукаевдин бошотулушу боюнча камакка алынып, 15-августта үй камагына чыккан. ИИМ баш коргоо чарасынын өзгөртүлүшү боюнча мурдагы башкы прокурор тергөө менен кызматташуу ниетин билдирди деп түшүндүргөн. Ал эми Салянова өзү бул тууралуу "Мен 73 күн камакта Атамбаевди коргогонумдан, ага жан тартканымдан отурган жокмун. Ал ага татыксыз. Менин камакта болгонумдун бир эле себеби бар - мен эч качан коррупцияга катышкан эмесмин" деп социалдык тармактагы баракчасына жазган.