Орусия санкция койгон польшалык сыр өндүрүүчүлөр товарын Кыргыз өлкөсүнүн атынан киргизүүгө аракет кылышкан

Орусия польшалык сыр өндүрүүчүлөрдүн товарын киргизүүгө тыюу салган. Бирок польшалык ишкерлер сырдын маркировкасын өзгөртүп, Кыргыз өлкөсүнүн атынан киргизгенге аракет кылышкан. Бул тууралуу бүгүн, 29-октябрда Ветеринардык жана фитосанитардык коопсуздук боюнча инспекциянын мүдүрү Калысбек Жумаканов маалымат жыйында айтты.

"Орусия Польша өлкөсүнөн келген сырларга санкция киргизген. Ал эми биздин мамлекет уруксат берген, себеби ал компания ЕАЭБдин алкагындагы реестирдин каттоосуна алынган. Келишимге ылайык, компаниянын сырларын биздин мамлекет 20 тоннадан ашпаган өлчөмдө жана ички рынокто гана колдонууга уруксат берген. Бирок өндүрүүчүлөр өздөрүнүн маркировкасын алып, этикеткасын жулуп, ордуна "Кыргыз өлкөсүнүн сыры" деп чаптап коюшкан. Андан соң өз продукцияларын Орусиянын аймагына киргизгенге аракет кылган. Бирок алардын куулугу билинип калган. Бул боюнча кызматтык иликтөө жургүзүлүп, ал компанияларды реестирден чыгарып салдык", - деди Жумаканов.