Акжолтой Канатбек уулу мындан 2 ай мурда үйлөнгөн. Ал сахнага "Раймалы" деген каймана ат менен чыкмак

Белгилүү төкмө акын, обончу Майра Керим кызынын баласы Акжолтой Канатбек уулу жол кырсыгына кабылып, 27 жашында мезгилсиз дүйнөдөн кайтты. Акжолтой Канатбек уулу ушул жылдын сентябрь айында сүйүктүүсү Изаард Канатова менен баш кошкон. Үй-бүлөлүк жашоого жаңы кадам таштаган жубайлар Кочкорго жентек тойго бара жатканда кырсыкка кабылган. Маркумдун кан досу Руслан Карыбеков SUPER.KG порталына досунун келечектеги пландары тууралуу айтып, анын кандай инсан болгонун эскерди.

Кырсык болгон күнү Акжол жана анын жубайы Изаард, Жоомарт, Кубат, дагы бир бала болуп Тоңдон келе жатышыптыр. Алар Кочкорго жентек тойго барышмак экен. Бирок тойго жетпей кырсыкка кабылышты. Мен ошол күнү Кочкордон Бишкекке келгем. Эмнегедир таңга маал уйкум качып ойгонуп кеттим. Ошондо мага каза болгон Жоомарттын номеринен Аскат деген бала чалды. Көрсө ал окуя болгон жерге барып, акыркы жолу кимдер менен сүйлөшкөнүн карап мага чалып жатыптыр. Биринчи укканымда ишенбей нес абалда туруп калдым. Таңга маалы мени эмнеге тамашаламак эле деп дос балдарга чала баштадым. Ошентип балдар чогулуп Кочкорго бардык. Акжолтой менен Изаарддын сөөгүн өлүкканадан алып чыгып Ысык-Көлгө алып кеттик. Ал эми Жоомарт менен Кубатты дагы айылдарына алып кетишти.

Кыргыз радиосунда 5 миң ыр бар болсо, анын ичинен 200гө жакыны Акжолтойго таандык болчу. Кыргыз эстрада ырчыларына ыр, обон жазуудан тышкары өзүнүн "Алчадай эриниңден", "Айтайынбы" жана башка бир топ сонун чыгармалары бар эле. Ырчы Курал Чокоев менен иштешип, сахнага "Раймалы" деген каймана ысым менен чыгайын деп "Бегимай, Бегимай" чыгармасын жаздырган.

Кыргыз эли дагы бир залкарынан айрылды. Бир боорумдан, эң жакын досумдан айрылып каным кайнап турат. Акжол, досум, мен сени эч качан унутпайм!".

Ал эми ырчы Курал Чокоев мына иштейбиз, ийгилик жаратабыз деп жатканда кырсык болуп кеткенин айтат.

"Мен продюсер болуп Акжолдун ырларын студиядан жаздырганбыз. Фотосессия жасаганбыз. Эки чыгармасы тасмага саундтрек болуп жазылган. Өзү дагы ошол тасмада роль жаратмак. Анан эле кырсык болуп кетти. Эми өзү болбосо дагы чыгармаларын көмүскөдө калтырбай, атын өчүрбөй жүрүшүбүз керек.

Акжолтой экөөбүз мындан 9 жыл мурда "Ысык-Көл кадыр түн-2010" фестивалында таанышканбыз. Ошондон бери ага-инидей болуп келе жатканбыз. Менин "Көк бөрү" жана башка ырларыма обон жазып берген. Аябай таланттуу болгондуктан, эстрадага чыгаралы деген тилегим болгон", - деди ал.

Акжолтой Канатбек уулу төкмө акын, ырчы жана актёр. Анын бир тууган эжеси жана агасы бар.