Жалал-Абаддагы окуучу кыздардын мушташынан кийин Аксы райондук билим берүү бөлүмүнүн башчысы кызматынан бошотулду

Жалал-Абад облусунун Аксы райондук билим берүү бөлүмүнүн башчысы кызматынан бошотулду. Бул тууралуу Билим берүү жана илим министрлигинин басма сөз кызматынан билдиришти.

"Аксы райондук билим берүү бөлүмүнүн башчысы У.М.Зиябекова Билим берүү жана илим министрлигинин 20-ноябрындагы буйругу менен "Мамлекеттик, жарандык кызмат жана муниципалдык кызмат жөнүндөгү" мыйзамынын 47-беренесине ылайык, ээлеген кызматынан бошотулду.

18-ноябрь күнү Жалал-Абад облусунун Аксы районундагы Жоробек Мамытбеков атындагы орто мектептин 10-11-классынын окуучу кыздарынын ортосунда мушташуу катталган. Жетекчи окуучулар арасында тиешелүү тарбиялык иштерди жүргүзгөн эмес. Зиябекованын буга чейин да жоюлбаган тартиптик жазасы бар, ага жүктөлгөн кызматтык милдеттерди бир нече жолу аткарбагандыгы эске алынды", - деп билдирет басма сөз кызматынан.

Жалал-Абад облусунун Аксы районундагы Жаңы-Жол айылындагы мектепте кыздар сай жээкке барып мушташканын "Элдик кабар" бөлүмүнө окурман жөнөткөн.