ЖЭБ соту: Мамлекеттик айыптоочу: "ЖЭБди жаңылоодогу коррупциялык схеманы жүргүзгөн топтун башында мурдагы өкмөт башчы Сапар Исаков турган"

Бүгүн, 27-ноябрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Анда тараптардын жарыш сөзү башталды.

Мамлекеттик айыптоочулар иштин алкагында айыпталуучулар катары өтүп жаткан мурдагы өкмөт башчылар Жантөрө Сатыбалдиеге, Сапар Исаковго, мурдагы энергетика министри Осмонбек Артыкбаевге, "Улуттук энергетикалык холдингдин" мурдагы башчысы Айбек Калиевге, "Улуттук энергетикалык холдингдин" жетекчисинин мурдагы орун басары Жолдошбек Назаровго, "Улуттук энергетикалык холдингдин" топ менеджери Салайдин Авазовго Бишкек ЖЭБин модернизациялоо башкарма тобунун директору Темирлан Бримкуловго жана мурдагы финансы министри Ольга Лавровага коюлган айыптар окулууда.

Анда тергөөдө айыпталуучулардын күнөөсү күбөлөр берген көрсөтмөлөр жана изилдөөгө алынган иш кагаздар менен далилденгени айтылды. Айыптоочу тараптын келтирген жүйөсүндө мурдагы өкмөт башчы Сапар Исаков ЖЭБди модернизациялоодо коррупциялык схеманы жүргүзгөн топтун башында турган жана Кытай тарап сунуштаган TBEAнын кызыкчылыгын көздөгөн. ЖЭБди модернизациялоону бир гана TBEA компаниясы гана ишке ашыра алат деген үгүттөө жүргөн. Ошол эле маалда тендерге катышкан башка компаниялардын сунуштары каралган эмес. Мунун натыйжасында мамлекетке ири суммадагы насыя сунушталган.