ИИМ: "Кой-Таш окуясы боюнча кармалгандарга соттук-психиатриялык экспертиза дайындалат. Алардын арасында Алмазбек Атамбаев дагы бар"

Кыргыз Республикасынын мыйзамына ылайык, оор жана өзгөчө оор кылмыштарды жасагандар соттук-психиатриялык экспертизадан өтүшү шарт. Бул тууралуу ИИМдин басма сөз кызматынан билдиришти.

Маалыматка ылайык, ИИМдин тергөө кызматы Чүй облусунун Аламүдүн районунун Кой-Таш айылында барымтага алуу жана массалык баш аламандык фактылары боюнча, сотко чейинки өндүрүштү иликтөөдө.

"Сотко чейинки өндүрүштүн алкагында жүргүзүлгөн иликтөөдө 16 адам шектүү катары аныкталып, алар оор жана өзгөчө оор кылмыштар боюнча шектелип жаткандыгы жөнүндө маалымдалган. 12-ноябрь күнү оор жана өзгөчө оор кылмыштар беренелери боюнча шектелип жаткандыгы жөнүндө маалымдалгандыгына байланыштуу, Жазык-процесттик кодексинин 171-беренесинин "экспертизаны дайындоонун негиздери" боюнча 16 шектүүгө карата, анын ичинде Алмазбек Атамбаевге дагы соттук-психиатриялык экспертизаларды дайындоо жөнүндө токтом чыкты. Саламаттыкты сактоо министрлигине караштуу республикалык психикалык саламаттык борборуна аткаруу үчүн жөнөтүлдү", - деди басма сөз кызматынан.