Кримтөбөл Батукаевдин иши. Жактоочу: "Алмазбек Атамбаевдин отурумга катышуусу боюнча судьяга өтүнмө киргизебиз"

Кримтөбөл Азиз Батукаевдин абактан мыйзамсыз бошотулушуна байланыштуу Бишкектин Биринчи Май райондук сотунда бүгүн, 17-декабрга белгиленген соттук отурум кайрадан жылдырылды. Буга отурумга мурдагы өлкө башчы Алмазбек Атамбаевдин жана Улуттук гематалогия борборунун мурдагы жетекчиси Абдухалим Раимжановдун келбегендиги себеп болгону айтылды.

Ал эми жактоочу Замир Жоошев: "Алмазбек Шаршенович ден соолугуна байланыштуу келе албагандыктан, отурум жылдырылды. Негизи Атамбаев отурумду менсиз өткөрө бергиле, жактоочуларым катышат деген позициясын билдирген. Бул эми адамдын өз каалоосу болуп жатат. Отурумга катышуудан баш тарткандыктан жана кан басымы туруктуу болбой жатканына байланыштуу документтерди даярдап жатабыз. Буга мыйзамдын маани-маңызы боюнча жол берилет. Адам өзү келгени менен суроо бербесе же жооп бербесе, отурганда эмне пайда? Ошол кагаздарга негиздеп, судьяга дагы бир жолу өтүнмө киргизебиз", - деди жактоочу.