Супер-Инфо
super.kg видео
Алмазбек Атамбаевдин жан сакчысы Канат Сагымбаев билдирүү жасады
Бүгүн, 20-декабрда мурдагы өлкө башчы Алмазбек Атамбаевдин жан сакчысы, УКМКнын 9-кызматынын мурдагы кызматкери Канат Сагымбаев ачык билдирүүсүн таратты. Бул тууралуу анын жактоочусу Бакытбек Автандил уулу айтып, кайрылуунун текстин социалдык тармактагы баракчасына жарыялаган.
Анда Сагымбаев 7-8-августта болгон Кой-Таш окуясын иликтөө боюнча түзүлгөн мамлекеттик комиссиянын чыгарган корутундусу менен макул эместигин билдирген.
“Комиссиянын курамы экс-президент Алмазбек Атамбаевге жеке таарынычы жана кеги бар адамдардан түзүлгөндүгүнүн өзүн акыйкатсыздык деп эсептейм. Корутундуда мага тиешелүү эки суроо боюнча коомго өз чындыгымды айтууну туура көрдүм. Ошол күнү жетекчилер “Альфа” атайын бөлүгүнүн кызматкерлерине “экс-президентти кармап алып келгиле” деген буйрук берсе, мага “аны кайтаруу керек” деген буйрук беришкен. Мен өз милдетимди так аткарып, кайтарылуучу объектимдин бир да тал чачын түшүрбөй, өткөрүп бердим.
Экс-президенттин үйүнө чабуул болорун мага эч ким алдын ала эскерткен эмес! Аны күч менен кармоого ноябрь айында Конституциялык палатанын чечими чыккан соң барышат го деп ойлочумун”, - деген жан сакчы.
Мындан тышкары, Сагымбаев жетекчилердин шалаакылыгынан, жоопкерчиликтен качкандыгынын айынан ага окшогон офицерлер садага чабылып, өзүлөрү апакай бойдон кала берип жатышканын дагы жазган.
"Менде экспертизанын Кой-Таш окуясында каза болгон «Альфа» атайын кызматынын командиринин орун басары СВД үлгүсүндөгү куралдын 7.62 огунан курман болду деп чыгарган жыйынтыгынан чоң күмөн саноо бар. Ошондуктан өзүмдүн мыйзамдуу укугумдан пайдаланып, аталган экспертизага мени катыштыргыла деп суранган элем. Тилекке каршы, катыштырышкан жок.
Экс-президент Алмазбек Атамбаевге жана мага коюлуп жаткан берене таптакыр негизсиз, атайын бөлүктүн кызматкери СВД куралынан жаракат алышы таптакыр мүмкүн эмес болчу. Бул айыпты эч кандай далили жок тагып жатасыңар", - деп жазылган билдирүүдө.
6
1 |