Курсан Асановдун баш коргоо чарасы 2020-жылдын февраль айына чейин узартылды

Ички иштер министринин мурдагы орун басары Курсан Асановдун баш коргоо чарасы 2 айга узартылды. Биринчи Май райондук сотунун маалымат кызматынан сот Асановду 2020-жылдын 23-февралына чейин үй камагында калтыруу чечимин чыгарганын билдирди.

13-августта Курсан Асанов "милициянын кызыкчылыгын сатты" деген жүйө менен министрдин орун басары кызматынан бошотулган. Ички иштер министрлигинин басма сөз кызматы министр Кашкар Жунушалиев Атамбаевди кармоо учурунда аны менен жалпысынан 3 жолу сүйлөшүү жүргүзгөнүн, министр макул кылдырган соң гана ал ишке Асанов аралашканы тууралуу маалымат тараткан.

Башкы прокуратура Курсан Асановдун иши боюнча кызматтык иликтөөнүн материалдары менен таанышып чыгып, ал материалдардын негизинде "кызматтык абалынан кыянаттык менен пайдалануу" беренеси боюнча кылмыш иши ачылган. Сотко чейинки өндүрүштү жүргүзүү Аскер прокуратурасына өткөрүлгөн.

27-августта Биринчи Май райондук соту Курсан Асановдун баш коргоо чарасын карап, 13-октябрга чейин үй камагына алуу чечимин чыгарган.

10-октябрда сот тарабынан Асановдун баш коргоо чарасы 23-декабрга чейин узартылган.