Кенже Дүйшеева Кыргыз Республикасынын Эмгек сиңирген артисти болду. "Сыйлык менин ак мээнетимдин үзүрү", - дейт ал

Президент Сооронбай Жээнбековдун Мамлекеттик сыйлыктарды ыйгаруу боюнча жарлыгына ылайык, ырчы Кенже Дүйшеевага Кыргыз Республикасынын Эмгек сиңирген артисти наамы ыйгарылды. SUPER.KG порталы ырчы айымды сыйлыгы менен куттуктап, бул тууралуу пикирин билди.

"Сыйлыкты жашыраак учурда алсам, балким, башкача кабыл алмактырмын. Азыр баарын таразалап калгандыктан, наамды чоң жоопкерчилик менен кабылдадым. Кыргыз эстрадасында иштеп жатканыма быйыл 26 жыл болуптур. Менимче, бул сыйлык менин акыркы 10 жылдагы ак эмгегимдин үзүрү. Баарынан да мени кубантканы, азыркыга чейин Эл артисттери, Эмгек сиңирген артист ага-эжелер "сен татыктуу алдың" деп куттуктап чалып жатышат. Ушул нерсенин өзү эле мен үчүн чоң сыймык. Социалдык баракчалардан бир да адамдын "татыксыз алды" деп жазганын көргөн жокмун. Ошол нерсеге да териме батпай кубанып жатам. Сыйлык үчүн эмгегимди баалаган элиме ыраазычылык билдирем", - дейт Кенже Дүйшеева.