Кыргыз-Тажик чек арасындагы жагдайды турукташтыруу боюнча делегациялардын жолугушуусу аяктады

Бүгүн, 10-январда Баткен районунун Көчө-Бою жергесинде Кыргыз-Тажик чек арасындагы жагдайды турукташтыруу боюнча делегациялардын жолугушуусу аяктады. Бул тууралуу Мамлекеттик чек ара кызматынын басма сөз кызматынан билдиришти.

Маалыматка ылайык, сүйлөшүүлөргө Кыргыз-Тажик чек ара өкүлчүлүктөрү ошондой эле эки өлкөнүн облустук администрацияларынын, ички иштер министрликтеринин жана прокуратура органдарынын өкүлдөрү катышты. "Жолугушуу учурунда тараптар бардык көйгөйлүү маселелер боюнча позициялары дал келерин жана аларды чечүүгө даяр экендиктерин билдиришти. Сүйлөшүүлөрдүн жыйынтыгы боюнча такталбаган жана көйгөйлүү болгон тилкелерде тараптардын чек ара кезметтеринин жүрүү маршруттары аныкталды жана макулдашылды. Ошондой эле тараптар чек арага жакын аймактын тургундары арасында түшүндүрүү иштерин жүргүзүүнү улантууда. Тараптардын укук коргоо органдары чек арага жакын аймактарда жана биргелешип кайгуул жүргүзгөн багыттарда коомдук тартиптин сакталышын камсыздашууда. Учурда чек ара тилкесинде жагдай туруктуу", - деп айтылат маалыматта.