Айсултан Назарбаев Нурсултан Назарбаевдин небереси эмес, баласы болорун жана аны өлтүрүүгө аракет кылышарын айтып чыкты

Казакстандын мурунку президенти Нурсултан Назарбаевдин небереси Айсултан Назарбаев социалдык тармактагы баракчасына сенсациялык ачылыш жасады. Ал Назарбаевдин небереси эмес, уулу экенин жазып чыкты.

"Менин апам таятамды кайырмакка илген, анткени мен анын уулумун" деп жазган Айсултан. Билдирүү бат эле талкууга түшүп, айрымдар Айсултан баңгизаттын таасиринен ушундай сөздөрдү жазып жатат дешсе, айрымдары "апасы Дарига Назарбаева мурунку президенттин кызы эмес", "Айсултандын апасы Дарига эмес, башка эле аял" деп жоромолдошууда.

Айсултан ага чейин "Жакын арада алар мени өлтүрүүгө же психологиялык жактан оорулуу экенимди далилдөөгө аракет кылышат. Же мени атамдай кылып камерада (абакта) асып коюшат", - деген билдирүү калтырган.

Жогорудагы билдирүүлөрдүн чын же калп экени азырынча белгисиз. Себеби бул билдирүүлөр башка эч ким тарабынан тастыктала элек.

Айсултан көп жылдан бери баңгизатын колдонуп келери белгилүү. Былтыр ал Лондондогу өзү жашаган мейманкананын балконунан секирүүгө аракет кылып, полиция кызматкерлери сактап калышкан.

Нурсултан Назарбаевдин кызы Дарига Назарбаева Рахат Алиевге турмушка чыгып, Нурали, Айсултан аттуу 2 уул, Венера деген кыздуу болушкан. Рахат Алиев кайнатасы Нурсултан Назарбаевди сындап баштагандан кийин анын үстүнөн адамды уурдоо жана башка кылмыштар боюнча иш козголуп, Алиев Европага качууга үлгүргөн. Акыры ал Австрияда колго түшүп, соттолгон. 2015-жылы Алиевдин жансыз денеси камерада асынган абалда табылган.