АКШда 10 жылдан бери башы ооруп жүргөн адамдын мээсинен курт алынды

АКШнын Техас штатынын жашоочусунун мээсинен курт алынганын чет элдик маалымат булактары жазып чыгышты. Ага ылайык, жерлиги мексикалык болгон Жерардо аттуу адам 10 жылдан бери баш оору менен жабыркап келген. Дарыгерлерге көрүнгөнү менен баш оорусунун себеби аныкталган эмес, бул убакыт ичинде ал баш ооруну басаңдатуучу дары-дармектерди ичип жүргөн. Оору убактылуу басылганы менен кайра кайталана берген.

Кийин АКШда жашап жүрүп, футбол аянтчасында эсин жоготуп жыгылган. Ооруканага жеткирилгенден кийин дарыгерлер анын мээсинде бир зат бар экенин аныкташкан. МРТ жасашканда белгисиз зат курт экендиги белгилүү болгон. Дарыгерлер ага оор операция жасашып, мээсинен 4 сантиметр узундуктагы куртту алып чыгышкан.

"Операциядан кийин Жерардонун абалы жакшы болуп, баш оорусу кайталанбай калган. Буга чейин жумушунан да аксап келген болсо, эми жакшы иштей баштаганын айткан. Ал эми анын мээсиндеги курт Мексикадан жеген чочконун этинен улам пайда болгон деген божомолду айтышкан. Айтымында, эт чала куурулган болушу мүмкүн. Анын бир тууган эжесинин мээсинен да бир канча жыл мурун курт алынган. Экөө ал этти чогуу жешкенин айтышкан. Дарыгерлердин айтымында, курттун мээге өтүп кетиши чанда кездешчү жагдай. Курт организмге киргенден кийин чоңураак көлөмгө жетмейинче оору көп билинбейт, ал чоңоюп кетсе ден соолукка оор залал келтирерин айтышкан", - деп жазылат маалыматта.