Ош шаарында мурда 16 ирет кылмыш жоопкерчилигине тартылган жаран кайрадан кармалды

Ош шаарында мурда 16 ирет кылмыш жоопкерчилигине тартылган жаран кайрадан кармалды. Бул тууралуу Ош ШИИБинин басма сөз кызматынан билдиришти.

Маалыматка ылайык, 2019-жылдын 12-октябрында Ош ШИИБинин нөөмөт бөлүмүнө Ош шаарынын тургуну 23 жаштагы кыз арыз менен кайрылган. Арызда 2019-жылдын 10-октябрь күнү Ош шаарынын Нурматов көчөсүндө жайгашкан кафеде эс алып жаткан учурда белгисиз жаран эч бир себепсиз аны уруп, бетине бир нече жолу тээп денесине жарат келтирип, окуя болгон жерден изин жашырып качып кеткен.

Бул факты Кылмыштардын жана жоруктардын бирдиктүү реестрине "бейбаштык" беренеси менен катталып, шектүүгө издөө жарыяланган. Жабырлануучуга тиешелүү экспертиза дайындалган. Тергөөнүн жүрүшүндө белгисиз адам Аманкелди аттуу уюшкан кылмыштуу топтун мүчөсү катары ИИМдин атайын тизмесинде турган жаран экендиги аныкталган. Ал Өзгөн районунда каттоодо турганы менен Ош шаарында жашап жүргөн. Көрүлгөн ыкчам иш-аракеттердин натыйжасында, 28-январь күнү 1997-жылы туулган шектүү А.А. кармалды. Ал учурда убактылуу кармоочу жайга киргизилип, териштирүү иштери аткарылууда.

Шектүү А.А. мурда жасаган кылмышы үчүн Ош шаарында жайгашкан жазаны аткаруу кызматынын жатак абактарынын биринде жазасын өтөп жатып, өз убагында каттоодон өтпөй, бул кызмат тарабынан дагы издөөдө жүргөндүгү аныкталган.