"Бирөөгө чалып алайын, телефонуңду берип турчу". Бишкекте алдамчылыкка шектелип 25 жаштагы жаран кармалды

Бишкекте 25 жаштагы айым алдамчылыкка шектелип кармалды. Ал бирөөгө чалып алайынчы деген сураныч менен чала таанышынын телефонун алып, качып кеткен.

26-январда Ленин РИИБине шаар тургуну А.Э. кайрылып, чала таанышына карата чара көрүүнү өтүнгөн. Арыздануучунун айтымында, "Беш-Сары" соода комплексиндеги радио түйүндүн жанынан чала таанышын жолуктуруп калган. Анда жабырлануучуга таанышы жумуш таап берүүнү убадалап, бирөөгө чалып алайын деп смартфонун сурап, топ элдин арасына кире качкан. Телефондун каптамасында 2 миң сом дагы бар экенин айткан жабырлануучу.

Факт Кылмыштардын жана жоруктардын бирдиктүү реестрине 204-берене (алдамчылык) менен катталып, сотко чейинки өндүрүш иши ачылды.

"Тергөө иш-чараларынын жүрүшүндө шектүү делинип 1994-жылы туулган Д.М. кармалып, убактылуу кармоочу жайга киргизилди. Учурда шектүүнүн мындан тышкары, шаар аймагында катталган кылмыш иштерине тиешеси бар же жок экендигин аныктоо үчүн тергөө улантылып жатат", - дейт Ленин РИИБинин басма сөз катчысы.

Эгерде сүрөттөгү жарандан жабыркагандар болсо же ал тууралуу мындан башка дагы маалымат билсеңиз 102ге же төмөнкү номерлерге байланышып коюуну милиция кызматкерлери өтүнөт.

Байланыш номерлери: 0(312) 352-605, 0(312) 352-947, 0(999) 570-070, 0(706) 570-070.