Көзү көрбөгөн кишини унаа сүзүп кетип, көрүүсү калыбына келген

Польшада көзү көрбөгөн адамды автоунаа сүзүп кетип, анын көрүүсү кайра калыбына келген. Бул тууралуу чет элдик басылмалар жазып чыгышты.

Польшалык Януш Горай 20 жыл мурун аллергиядан улам көзүнөн айрылган. Аллергиядан улам анын оң көзүнүн чел кабыгында маселе жаралып, сол көзү жарык менен келбетти гана айырмалай билчү. Бир күнү ал жөө жүргүнчү өтчү жол менен кетип баратканда автоунаа сүзүп кетип, санына операция жасаткан. 2 аптадан кийин Януш Горай көзү кайра мурункудай жакшы көрүп калганын билдирген. Андан сырткары, кыска аралыкта анын кырсыктан алган бардык жаракаттары айыгып кеткен. Дарыгерлер мындай укмуштуу көрүнүш анын ичкен дарыларынын кыйыр таасиринен болушу мүмкүн деген вариантты караган. Ал эми Януш автокырсыкта ал башы менен биринчи капотко, андан соң асфальтка тийгени үчүн көрүүсү калыбына келгенин айткан.

Дарыгерлер мындай кереметтин так себебин аныктоо үчүн изилдөө жургүзмөй болушканда Януш Горай катышуудан баш тарткан.