Казакстандагы массалык мушташта каза болгондордун жана жаракат алгандардын саны айтылды

7-февралда Кыргыз-Казак чек арасына жакын Жамбыл облусунун Масанчи айылында жергиликтүү тургундардын ортосунда массалык мушташ орун алып, ок атышуу болгону кабарланган.

Жаңжалдын кесепетинен 8 адам каза болуп, 40 жаран денесинен ар кандай жаракаттарды алды. Маалыматты чет элдик басылмалар Казакстандын ички иштер министри Ерлан Тургумбаевге таянуу менен жазып чыгышты.

"Массалык баш аламандыкты токтотуу учурунда кызматын өтөп жүргөн полиция кызматкерлери дагы жаракат алышты. Укук коргоочулардын экөөнө ок тийди (каза болгон жок). Учурда жаңжалдын 47 катышуучусу кармалды. Кармалгандардан эки мылтык алынды", - деген министр.

Казакстандын президенти Касым-Жомарт Токаев абал курчуп кетпеши үчүн тиешелүү мамлекеттик органдарга чукул чара көрүүнү тапшырган.