10 миң доллар. Транспорт жана жолдор министрлигинин эки өкүлү пара берүү фактысы менен кармалды

Пара берүү фактысы боюнча транспорт жана жолдор министринин орун басары менен автомобиль, суу транспорту жана салмак габаритти контролдоо агенттигинин директору кармалды. Бул тууралуу Улуттук коопсуздук мамлекеттик комитетинин маалымат кызматынан билдиришти.

Транспорт жана жолдор министринин орун басары Н.Ж. УКМКнын кызматкерлерине 10 миң доллар өлчөмүндөгү пара берип жаткан учурунда кармалды.

"Министрдин орун басары автомобиль, суу транспорту жана салмак габаритти контролдоо агенттигинин кызматкерлерине карата ачылган кылмыш ишин токтотуу максатында пара берген. Ошол эле күнү министрликтин алдындагы автомобиль, суу транспорту жана салмак габаритти контролдоо агенттигинин башчысы Б.А. пара берүүгө катыштыгы бар экендиги аныкталып, кармалды.

Сотко чейинки өндүрүштүк материалдар 328-берененин 3-бөлүмү (Пара берүү) боюнча Кылмыштардын жана жоруктардын бирдиктүү реестрине катталды.

Кармалгандар УКМКнын тергөө камак жайына киргизилди. Тергөө иштери улантылып жатат", - деп жазылат маалыматта.