Лексус-470, Лексус-350... Бишкектеги техникалык тейлөө жайынан чыккан өрттөн 8 унаа күйүп кетти

9-февралда Бишкектеги Жусуп Абдрахманов көчөсүнүн №242 дарегинде жайгашкан унааларга техникалык кызмат көрсөтүүчү жайдан өрт чыккан. Анын кесепетинен 8 унаа күйүп кетти.

ӨКМнын маалымат кызматынан билдиришкендей, өрттөн улам “Малярка kg” техникалык тейлөө жайынын 630 чарчы метр аянты күйдү. Ишкананын ичиндеги Тойота Виш, Лексус-470, Тойота Цинос, Лексус-350, БМВ-34, БМВ-39, Мерседес-Бенц-124, Фольксваген Гольф-3 үлгүсүндөгү 8 унаа дагы күйүп кетти.

Мындан тышкары, 25 жаштагы эркек адам иске ууланып, ооруканага жеткирилген. Абалы канааттандырарлык. Каза болгондор жок.

Өрттү өчүрүүгө жалпысынан 5 бөлүм жана бир штаб тартылган. Мындан сырткары, "Тез жардам" кызматынан 2 бригада, РЭТ мекемесинен 1 бригада, ИИМден 39 кызматкер, "Жашылдандыруу" муниципалдык ишканасынан 1 суу ташуучу унаа тартылган.

Тартылган күчтөрдүн жардамы менен өрт саат 15:45те чектөөгө алынып, саат 17:46да толук өчүрүлгөн. Өрттүн келип чыгуу себеби жана келтирилген материалдык чыгымдар такталууда.