"Коронавирустан сактангыла! Инфекциялык ооруканага вирус менен жабыркаган жаран түштү, абалы оор" деген билдирүү боюнча министрлик жооп берди

Социалдык тармактарда Республикалык жугуштуу оорулар клиникалык ооруканасына оор абалда бейтап келип түшкөнү, ал коронавирус менен жабыркагандыгы айтылган аудио тарап жатат.

Анда белгисиз аял тааныштарына кайрылып, көчөгө чыкпоого, коомдук жайлардан тамактанбай турууга, медициналык бет каптарды тагынууга, үйдү жыйноодо хлор колдонууга жана вируска каршы мазь сүйкөп жүрүүгө чакырып жатканын угууга болот.

Саламаттыкты сактоо министрлигинен интернетке тарап жаткан аудио билдирүү чындыкка дал келбей турганын айтышты.

"Билдирүү чындыкка дал келбейт. Бүгүнкү күнгө карата өлкөдөгү эпидемиологиялык абал туруктуу, коронавирус менен жабыркагандар каттала элек. Учурдан пайдаланып, элге кайрылып, расмий гана маалыматтарга ишенүүгө чакырабыз", - деди мекеменин басма сөз катчысы.