Дагы бир Кыргыз жаранынан коронавирус аныкталганы айтылууда. Учур Бириккен Араб Эмирлигинде катталды

Кечээ, 17-мартка карата алынган маалыматка ылайык, Бириккен Араб Эмирлигинде Кыргыз жаранынан коронавирус аныкталды. Бул тууралуу араб басылмалары жазып чыгышты.

Бириккен Араб Эмирлигинин Саламаттыкты сактоо министрлиги кечээ, 17-март күнү өлкөдө 15 коронавирус катталганын жана ооругандардын жалпы саны 113кө жеткенин билдирди.

"Коронавирусту аныктоо мониторинг системи жана буга чейин вируска кабылган жарандар менен жакын байланышта болгон адамдарга текшерүү жүргүзүү менен ишке ашырылды. Ошондой эле чет өлкөдөн келип, карантинге алынгандардын арасынан да вирус аныкталды", - деп айтылат министрликтин билдирүүсүндө.

"Учурда вирус аныкталгандардын абалы туруктуу жана керектүү медициналык жардам көрсөтүлүүдө. Алардын арасында Кыргыз өлкөсү, Сербия, Италия, Нидерланды, Греция, Австралия, Германия, АКШ, Орусия, Украина, Бангладеш өлкөлөрүнөн 1ден жаран жана Улуу Британия менен Испаниядан 2 жарандан коронавирус аныкталган", - деп жазылат маалыматта.

Окуя тууралуу Республикалык штаб азырынча маалыматты тактай элек.