Коронавирус аныкталган 3 Кыргыз жараны 12-мартта учуп келишкен. Обсервацияга алынган эмес

"Коронавирус жуктуруп алганы аныкталган 3 Кыргыз жараны Сауд Арабиядан 12-мартта учуп келишкен". Бул тууралуу бүгүн, 18-мартта саламаттыкты сактоо министри Космосбек Чолпонбаев билдирди.

Коронавирус аныкталган 3 Кыргыз жаранынан тышкары кичи ажылык зыяратта 5 жаран болгон. Алар учуп келген аба каттамында 135 жүргүнчү бар болгону аныкталып, азыркы учурда 90дон ашуун жүргүнчүнүн аты-жөнү такталып, обсервацияга алынган. "Аларга керектүү дарылануу жүргүзүлүп жатат. Коронавирус аныкталгандар Жалал-Абадда дарыланып жатышат", - дейт министр.

"Коронавирус жуктуруп алганы аныкталган Кыргыз жарандары эмне үчүн Кыргыз өлкөсүнө учуп келери менен обсервацияга алынган эмес?" деген суроого Саламаттыкты сактоо министрлигинен алардын 12-мартта учуп келгенин жүйө кылышты.

12-мартта республикалык штаб коронавирустун чыккан учуру катталган өлкөлөрдөн келгендердин бардыгы 3 категорияга бөлүнөрүн маалымдаган. Сауд Арабия 3-категориянын ичинде болчу. Аталган өлкөлөрдөн келсе, баштапкы текшерүүгө алынып, андан ары үйүнө коё берилет деп айтылган.