Оштогу умрадан келген жарандардын окуясы. Кайрылуудан кийин алар башка обсервацияга которулду

Ош шаарынын №7 бейтапканага жаткырылган жарандар карантинде кармоо шарттарына арызданышкандан кийин башка обсервацияга которулду. Бул боюнча Ош шаарында коронавирустун алдын алуу боюнча атайын штабдын мүчөсү, Ош шаардык балдар инфекциялык ооруканасынын дарыгери Кайрат Абжалов маалымат берди.

Анын айтымында, бейтаптар бардык зарыл шарттар түзүлгөн башка обсервацияга жаткырылды. Аларга тынымсыз кам көрүлүп, күнүнө 4 жолу медициналык бет кап жана антисептикалык каражаттар менен камсыз болушат. Бейтаптарга кезек менен жугуштуу оорулар дарыгери, медайым жана санитаркалар кам көрүшөт.

Буга чейин ыкчам карантинге алууда даярдалган обсервация жайларына жаткырылган эле. Шаар мэри Таалайбек Сарыбашов тарап кеткен видеодон кийин тиешелүү жетекчилерге ар бир жаткырылган жаранга кайдыгер карабоо тапшырмасын берип, өз көзөмөлүндө болорун айтты.

Эске салсак, кечээ, 18-март күнү Ош шаарында умрадан келип обсервацияга алынган жарандар алар жаткан жерде шарттын жоктугу жана эч ким кабар албай жаткандыгы тууралуу айтып нааразы болгон видео социалдык тармакка тараган эле.