Кытайда коронавируска каршы күрөшүүдө колдонулуучу дары аныкталды

Кытай бийлиги дүйнөнү дүрбөтүп жаткан коронавирус менен жабыркап жаткан жарандарды дарылоо үчүн колдонула турган эң негизги дарыны атады. Бул тууралуу кытайлык басылмалар жазышууда.

Коронавирус менен күрөшүүдө колдоно турган дары Авиган (Фавипиравир деп да аталат) деп аталат. Ал сасык тумоого каршы күрөшүүчү каражат. Улуттук биотехнологияны өнүктүрүү борборунун башчысы Чжан Синьминдин айтымында, бул каражатты Ухан жана Шэньчжен аймактарындагы вируска кабылган жарандарды дарылоодо колдонулган. Тестирлөөгө 240тан ашык бейтап катышкандыгы айтылат. Авиган дарысын колдонгондон 2 жарым күндөн кийин бейтаптардын дене табы калыбына келе баштаган. Ал эми аталган дарыны колдонбогон бейтаптардын дене табын калыбына келтирүү дээрлик 4 суткага созулган. Ошондой эле Авиган дарысы жөтөлдү айыктырууда да өз эффективдүүлүгүн көрсөткөн.

Авиган (Фавипиравир) япониялык "Fujifilm Holdings" корпорациясы тарабынан сасык тумоону дарылоо үчүн иштелип чыккан. Ошондой эле бул дарыны эболага каршы күрөшүүдө да колдонушкан.