Чет өлкөлөрдө 5 Кыргыз жаранынан коронавирус аныкталды. Дагы эки даваатчы илдетти жуктуруп алган

Чет өлкөлөрдө 5 Кыргыз жаранынан коронавирус аныкталды. Бул тууралуу республикалык штабдын онлайн маалымат жыйынында айтылды.

Алардын ичинен:
Бириккен Араб Эмирликтеринде – 1 жаран (Сауд Арабиянын Жидда шаарына барып келген);
Пакистанда – 3 жаран;
Испанияда - 1 жаран.

“Алардын баары ошол өлкөлөрдө тийиштүү түрдө дарыланып жатат. Баарынын абалы жакшы. Испаниядагы Кыргыз жаранында оору жеңил формасында өтүп жатат. Ошондуктан ал үй карантининде дарыланууда”, - дейт Саламаттыкты сактоо министрлигинин өкүлү Айнура Акматова.

17-мартта араб басылмалары 1 Кыргыз жаранынан коронавирус аныкталганын жазып чыгышкан, бирок бул маалыматты ушул күнгө дейре республикалык штаб да, Тышкы иштер министрлиги да ырасташа элек болчу.

22-мартта Пакистанда 1 Кыргыз жараны коронавирус жуктуруп алганы айтылган. Илдетке чалдыккан жаран менен кошо даваатка барган 4 Кыргыз жараны да карантинге алынганы маалымдалган эле.