"Кыргыз өлкөсү эмнеге көп жардам алып жатат же вируска чалдыккандардын саны жашырылып жатабы?". Министрдин жообу

Бүгүн, 30-мартта Өкмөт үйүндө биринчи вице-премьер-министр Кубатбек Бороновдун, саламаттыкты сактоо министри Космосбек Чолпонбаевдин жана ички иштер министри Кашкар Жунушалиевдин катышуусунда маалымат жыйын өттү.

Анда "Биздин өлкө эмнеге көп жардам алып жатат? Бүгүнкү күнгө берилген статистика чындыкка дал келбейби, так маалымат жашырылып жатабы?" деген суроолор берилди.

Министр Космосбек Чолпонбаев вируска чалдыккандардын санын жашыруу мүмкүн эместигин белгиледи. "Бүгүнкү күндө 94 жарандын вируска чалдыкканы так. Бизде маалыматты жашыруу мүмкүн эмес. Вирустук инфекциянын алдын алуу, анын жайылып кетүү коркунучун жоюу үчүн көп жардам алынып жатат", - дейт министр.

"Бир жолку текшерүүдөн эле баары билинип калбайт. Бир, эки же үч жолку текшерүүнү талап кылган учурлар дагы болуп жатат. Ошондуктан кокус бирдеме болуп кетпесин деп алдын алып жатабыз", - деп кошумчалады Кубатбек Боронов.