Валентина Шевченкого операция жасалды

UFC уюмунун чемпиону Валентина Шевченко 9-февралда болгон UFC 247 турнириндеги америкалык мушкер айым Кэтлин Чукагян менен болгон беттеште жаракат алып, операция жасатты. Бул тууралуу мушкер айым социалдык тармактагы баракчасы аркылуу билдирди.

"Дарыгерлер жаракатымды өзү айыгат деп айтышкан. Бирок аны күтүш керек болчу. Мен операция жасатпай эле беттешке чыгууга макул болгом. Коронавирус пандемиясынан улам турнир жылдырылат деген имиштерден улам күтпөй эле операция жасаттым. Эгерде турнир өз убагында өтсө, мен операция жасатмак эмесмин. Азыр физиотерапиядан өтүп жатам жана август айына чейин октагонго кайтып барам деген үмүттөмүн", - деп билдирген мушкер айым.

Маалыматка ылайык, буга чейин "MMA Fighting" басылмасы Валентина Шевченконун июнь айында UFC 251 турниринин алкагында шотландиялык Жоан Калдервуд менен болгон беттеши Шевченконун жаракат алып калгандыгына байланыштуу кийинкиге жылдырыларын жазып чыккан.