Тажикстанда обсервацияда иштеген медицина кызматкери каза болду

Тажикстанда обсервацияда иштеген 58 жаштагы медицина кызматкери каза болду. Бул тууралуу Тажикстандын Саламаттыкты сактоо жана социалдык коргоо министрлигинин берген маалыматына таянып, өлкөнүн жергиликтүү басылмалары жазып чыгышты.

Маалыматка ылайык, 58 жаштагы Оишамо Алимова 10 чакты адам карантинде жаткан Бохтар шаарындагы борбордук облустук ооруканасынын кызматкери болгон. Алимова 12-апрель күнү каза болгон. Министрликтин билдиришинче, ал коронавирус менен ооруган эмес, диагнозу - пневмония, артериянын коронардык атеросклероз, жүрөгүнүн сол кабынын гипертрофиясы болгон. Маркум ооруканада дарыгер болгонбу же медайым болгонбу айтылган эмес.

Белгилей кетсек, Бохтардагы облустук ооруканада учурда көбүнчө Орусиядан келген Тажик жарандары жатышат. Саламаттыкты сактоо жана социалдык коргоо министрлиги өлкөдө коронавирус катталбаганын билдирет.