Бишкек: Кикбоксчу Алексей Федосеевди сабап кетишти. Учурда ооруканада

Бишкекте 30-август күнү белгилүү кикбоксчу Алексей Федосеевди кафеден бирөөлөр сабап салышты. Учурда спортчу ооруканада. Анын машыктыруучусу Жанбулат Амантаевдин бизге билдиришинче, окуя "Тагай-Бий" кафесинде болду. Үйлөнүү тойго конокко барган спортчу менен бирөө мушташып кетиптир. Урушту ал жердегилер токтотууга аракет кылышкан, бирок өчөшүп калган он чакты адам Федосеевди кафенин жанынан сабап салышты. Спортчунун астынкы жаагы талкаланып кеткени белгилүү болду. Учурда окуя боюнча териштирүү жүрүп, экспертиза дайындалды. Спортчуну сабагандар изделүүдө.   

Алексей Федосеев - кыргызстандык кикбоксчу. 2008-жылы Европа чемпиону аталса, 2010-2011-жылдары Евразия чемпиону, 2012-жылы континенттер аралык чемпион болууга жетишкен. 2012-жылы Дүйнө чемпиону болгон. Мындан сырткары көптөгөн республикалык жана эл аралык ири мелдештердин жеңүүчүсү.