Кыргыз-Тажик чек арасындагы чыр-чатактан 3 кыргыз аскери жаракат алышты

Кыргыз-Тажик мамлекеттик чек арасындагы чырдан улам 3 аскер кызматкери жаракат алышты. Маалыматты Чек ара кызматынан кабарлашты.

"Атышуу учурунда Кыргыз Республикасынын Мамлекеттик чек ара кызматынын 3 аскер кызматкери ар кандай даражадагы жаракат алып, аларга өз убагында тиешелүү медициналык жардам көрсөтүлдү.

Учурда Кыргыз өлкөсү менен Тажикстандын чек арачыларынын ортосундагы ок атышуу токтоду. Чыр-чатак тажик аскер кызматкерлери тарабынан чагымчыл аракеттери менен коштолуп күтүүсүздөн (такталган маалыматтар боюнча) топтук куралдан кыргыз чек арачылары жана Кыргыз жарандары тарапка ок атылды.

Кыргыз-Тажик мамлекеттик чек ара аймагындагы кырдаалды турукташтыруу боюнча өлкөнүн Баткен багыты жана Тажик Республикасынын Исфара багыты боюнча чек ара өкүлдөрүнүн жолугушуусу болуп жатат", - деди мекеменин маалымат катчысы.

Окуянын чоо-жайы:

Бүгүн, 8-майда Баткен облусунун Чек аймагындагы 50 сотых жер тилкеси үчүн кыргыздар менен тажиктердин ортосунда чыр чыккан. Аталган жер тилкеси изилденбеген аймакка кирет, бирок Кыргыз тарап бул участокту пайдаланып келет. Жер тилкеси үчүн 30-40ка чукул кыргыздар менен 30-40тай тажиктер бири-бирине таш ыргытышып, уруш учурунда ок дагы атылган.