Кир жуучу машина, муздаткыч. Ырчы Самара Каримова Кыргыз-Тажик чек арасында жашаган элге 1 жарым миллион сомдук жардам көрсөттү

Кыргыз Республикасынын Эмгек сиңирген артисти, ырчы Самара Каримова Кыргыз-Тажик чек арасында жашаган мекендештерибизге барып, 1 жарым миллион сомдук жардам көрсөттү. "Кайрымдуулук иштерибиз менен башкаларга үлгү бололу" деген максатын айткан ырчы айым төмөнкүлөргө токтоло кетти.

"Буга чейин үй-бүлөбүздүн атынан Лейлек районунда селден жабыр тарткан үй-бүлөлөргө, Оштогу "Тез жардам" кызматында иштегендерге, муктаж үй-бүлөлөргө, карылар үйүнө жардам көрсөткөн элек. Андан кийин кайрымдуу адамдар көп экенине көзүм жетип, Элсомдон эсеп ачкам. Элсомго жалпы 200 миң сомго жакын акча түштү. Ага АКШдагы мекендештер, интернет айдыңындагы менин күйөрмандарым өз салымын кошушту. Менин кайрымдуулук демилгемди Каныбек аттуу жигит колдоп, экөөбүз жалпы 1 жарым миллион сомго Лейлектеги Кыргыз-Тажик чек арасында жашаган алыскы аймактагы мекендештерге май, ун, күрүч, шекер сыяктуу күнүмдүк турмушта керектелүүчү азык-түлүктөрдү алып, андан сырткары акчалай жардам, телефондоруна бирдик салып бердик. Ошондой эле көп балалуу үй-бүлөлөрдү кир жуучу машина, муздаткыч менен камсыздадык", - дейт Самара Каримова.