МАИчилерди тоготпой качкан айымдын унаасынын номуру чечилип, бирок бир телефон чалуудан кийин кайтарып берилиптир

Бишкекте МАИчилерди тоготпой качкан айымдын унаасынын номуру чечилип, бирок бир телефон чалуудан кийин кайтарып берилиптир. Муну Бишкек ШИИБинен билдиришти. Белгилүү болгондой, окуя ушул жылдын 9-июлунда болуптур. Бул күнү Жол кайгуул кызматы телеканалдардын бири менен рейд жүргүзөт. Иш-чара учурунда МАИчилер жол эрежесин бузган Лексус унаасын токтотууга аракет кылат, бирок рулдагы айым унаасын токтотпой шаар аралап качканын кадрдан көрүүгө болот. Качып бара жаткан учурда башка айдоочуларга, айрым жөө адамдардын өмүрүнө коркунуч жараткан. Айдоочу Назгүл Чодронова иштеген жерине жеткенде гана унаасын токтоткон.  

"Инспектор Улан Макеев унаанын номерин чечип алып, Чодронованын документтерин талап кылганда, ал ички иштер министри Абдулда Суранчиевге, Бишкек ШИИБинин башчысы Мелис Турганбаевге чаларын айтып коркуткан. Ошол эле учурда ал телефон аркылуу кимдир-бирөөлөргө чалып, окуяны айткан соң инспектор Улан Макеевге командири телефон чалып, ал номерди кайра кайтарууга аргасыз болгон",- деп билдиришти Бишкек ШИИБинен. Командир ким экени азыр такталып жатыптыр. Министр Абдулда Суранчиев дагы, Мелис Турганбаев дагы аталган айымды тааныбастыгын, жана андан эч кандай телефон чалуу болбогонун билдиришти. Учурда окуя боюнча иликтөө иштери уланууда.