МАИ кызматкерлерин тоготпогон айдоочу Назгүл Чодронова окуя болгон учурда кимге чалганы териштирилүүдө

МАИ кызматкерлерин тоготпогон айдоочу Назгүл Чодроновага байланыштуу протокол түзүп, материал толтурбагандыгы жана анын унаасынын номерин кайра кайтарып бергендиги үчүн Жол кайгуул кызматынын инспектору Улан Макеевдин күнөөсү бар же жок экендиги териштирилет. “Бул окуяда инспектордун да күнөөсү бар. Анын күнөөсү канчалык деңгээлде экени билингенден кийин ага карата чара көрүлөт”,- деп билдирди Бишкек ШИИБинин басма сөз кызматы. Интернет булактарына жүктөлгөн видео тасмада белгилүү болгондой, Жол кайгуул кызматкерлери токтоткондо токтобой артынан куудурган айдоочу айым Назгүл Чодронова кызмат ордуна жеткенде гана токтогон. Ал инспекторго себепсиз токтотуп жатканын жана А.Суранчиевге, "Мелис байкеге" чаларын айтып коркуткан. Көп өтпөй айдоочу айым кимдир-бирөөлөргө чалып, окуяны айтып берген. Андан соң Жол кайгуул кызматынын инспектору Улан Макеевге да телефон чалуу болуп, ал жол эрежесин бузган айымдын унаасынын чечилип алынган номерин кайра кайтарып берген. Бул боюнча эч кандай протокол түзүлүп, материал толтурулган эмес. Бишкек ШИИБинин басма сөз кызматы окуя болгон учурда Н.Чодронова кимге чалганын териштирүү иштери жүрүп жатканын билдирди. “Эгер ал адам биздин кызматкерлердин катарындагы эле бирөө болсо, ага карата чара көрүлөт”,- деп билдирди ШИИБдин басма сөз кызматы.