Республикалык штабдын жыйынында ата мекендик жеке коргонуу каражаттарын чыгаруу иштерин тездетүү зарылдыгы айтылды

Ата мекендик жеке коргонуу каражаттарын чыгаруу иштерин тездетүү зарыл. Тиешелүү тапшырма республикалык ыкчам штабдын жыйынында берилди. Бул тууралуу республикалык штабдан билдиришти.

Саламаттык сактоо министри Сабиржан Абдикаримов өлкөдөгү COVID-19 боюнча эпидемиологиялык абал тууралуу отчёт берип, эң актуалдуу маселелерди айтты.

Биринчи вице-премьер-министр Кубатбек Боронов белгилегендей, оорунун белгилери жок, илдетти кайдан жуктурганы белгисиз жарандар күн сайын көбөйүүдө.

"Бир аптада эле 31 адамда жуктуруу булагы белгисиз COVID-19 аныкталды. Алардын арасында шаардык базарлардын, банк кызматкерлеринин, ири цехтердин, бала бакчалардын кызматкерлери бар. Бул адамдар Бишкекте коомдук жайларда жуктурган деп болжолдоого болот. Саламаттыкты сактоо министрлигинин жана республикалык ыкчам штабдын бет кап тагынуу жана социалдык аралыкты сактоо боюнча сунуштамаларына кош көңүл кароо кейиштүү кесепеттерге алып келүүдө", - деди Кубатбек Боронов.

Жыйындын жүрүшүндө штабдын мүчөлөрү медициналык багыттагы, анын ичинде жеке коргонуучу каражаттарды жана медициналык жабдуулар боюнча ата мекендик өндүрүштүн мүмкүнчүлүктөрү жөнүндө маселени талкуулашты.

Белгилүү болгондой, учурда жеке коргонуунун каражаттары боюнча тиешелүү сапат стандарты иштелип чыкты. Тармактык мамлекеттик органдарга ыкчам штабдын тапшырмаларын жүзөгө ашыруу боюнча ишти тездетүү милдеттендирилди.

"Чалдыбар - автожол" өткөрмө жайынын ишин камсыздандырууга байланыштуу жүк ташуучу унаалардын айдоочуларын текшерүү алгоритмин так аткаруу боюнча тапшырмалар берилди.