АКШга качып кеткен Жогорку Кеңештин экс-депутаты Аскарбек Шадиев 13 жылга эркинен ажыратылды

2018-жылдын апрель айында өлкөдөн АКШга качып кеткен Жогорку Кеңештин экс-депутаты Аскарбек Шадиевдин иши боюнча сот чечим чыгарды.

Маалыматка ылайык, чечимди Биринчи Май райондук соту кечээ, 10-июнда чыгарган.

Анда Аскарбек Шадиев "мыйзамсыз баюу" беренеси менен күнөөлүү деп табылып, 60 миң айып салуу жана мүлкүн конфискациялоо менен 13 жылга эркинен ажыратылды.

Ошондой эле жеке ишкер Вячеслав Дуплищев күнөөлүү деп табылып, мүлкүн конфискациялоо жана 60 миң сом айып салуу менен 5 жылга эркиндигинен ажыратылды.

Окуянын чоо-жайы:

2018-жылдын 29-апрелинде Аскарбек Шадиевге карата “кызматынан кыянаттык менен пайдалануу” беренеси боюнча Башкы прокуратура кылмыш ишин козгогон. 1-июнда УКМК Шадиевдин 27-апрелде Кыргыз өлкөсүнөн чыгып, АКШга кетип калганын аныктаганын билдирген.

Ага карата “чек араны мыйзамсыз кесип өтүү” беренеси боюнча кылмыш иши козголгон. Башкы прокуратура дагы бир кылмыш ишин козгоп, ал “мыйзамсыз жол менен алынган акчалай каражаттарды же башка мүлктү легалдаштыруу” беренесинин негизинде ачылган. Шадиевдин иши боюнча тергөө аяктап, сотко өткөн. 2-ноябрда Аскарбек Шадиев Жогорку Кеңештин депутаты мандатынан ажыратылган.