УКМК: "Ошто эл аралык террордук уюмдун активдүү мүчөсү кармалды"

Ош шаарында эл аралык террордук уюмдун активдүү мүчөсү кармалды. Бул тууралуу Улуттук коопсуздук комитетинин басма сөз кызматынан билдиришти.

Ага ылайык, кармалган жаран 2014-жылдан 2017-жылдар аралыгында Сирия аймагында болуп, Сирия Республикасынын өкмөтүнүн аскерлерине каршы эл аралык террордук уюмдун катарында куралдуу жаңжалдарга катышып келгени айтылат.

"Кылмыш-жаза кодексинин 395-беренесинин 2-бөлүмү (жалдануучулук) фактысы боюнча Кылмыштардын жана жоруктардын бирдиктүү реестрине катталган сотко чейинки өндүрүштүн алкагында, 1989-жылы туулган Кыргыз өлкөсүнүн жараны Т.Н. кармалды.

Жогорудагы соттук териштирүүнүн материалдары жана Ош шаардык сотунун чечими менен анын жашаган жеринде санкцияланган тинтүү жүргүзүлдү. Жыйынтыгында кандайдыр бир тыюу салынган буюмдар табылган жок. Кармалган адам УКМКнын тергөө камак жайына киргизилди", - деп жазылат маалыматта.

Учурда тийиштүү тергөө иштери жүрүп жатат.