Позитив! 10 жаштагы Айшанур фотоаппарат алуу үчүн чогулткан акчасын коронавирустан жабыркагандарга өткөрүп берди

Пандемияга байланыштуу өлкөдө болуп жаткан акыркы оор кырдаалда биздин мекенчил жаштар четте карап турбастан, ар бири колдон келген салымын кошуп жаткан учуру. Алардын катарында өспүрүм балдардын да бар экендиги кубандырат.
10 жаштаггы Айшанур Токтобаева Караколдогу Х.Карасаев атындагы "Сапат" мектебинин окуучусу. Кичинекей Айшанур акча чогултуп, фотоаппарат сатып алсам деп кыялданчу. Көптөн бери чогултуп жүргөн кутучасындагы тыйындары үч миң сомго чамалап калганын айтат. Анын ата-энеси өлкөдөгү болуп жаткан абалга кызынын көңүлүн көп бурдурбоого аракет кылса да, Айшанурдун зиректиги окуяларды жаңылыктардан көрүп, сарсанаа боло берчү. Чогулткан акчасын үчкө бөлүп, эки бөлүгүн терминал аркылуу короновирус менен күрөшүү фондуна которсо, калган бардык майда тыйындарын Каракол шаарындагы штабдардын бирине берген. Бул тууралуу SUPER.KG порталына Айшанурдун жакындары билдиришти.

Эске салсак, мындай кайрымдуулук иштер өспүрүмдөр арасында биринчи жолу болуп жаткан жок. Буга чейин көптөгөн кичинекей балдар колунан келген жардамын көрсөтүшүп, элдин батасына татышкан.