"Ооруну жашырбаңыздар, ал баарыбыздын башыбызга бирдей келди". Өкмөт башчы бейтаптардын ооруканага кеч кайрылуусу өлүмдүн көп катталышына себеп болгонун айтты

Акыркы эки күндө өлкөдө коронавирус инфекциясынан жана пневмониядан каза болгондордун саны бир аз азая түштү. Өлүмдүн көп катталышына бейтаптардын кеч кайрылуусу себеп болуп жатканын премьер-министр Кубатбек Боронов брифинг учурунда белгиледи.

"Коронавирус инфекциясына каршы күрөшүүдөгү негизги талап өлүмдүн катталуусун азайтуу жана жок кылуу. Биздин анализге ылайык, өлүмдүн көп катталышы бейтаптар ооруканага кеч кайрылуусунда болуп жатат. Айрым учурда биз дагы өткөрүп жиберип алып жатабыз. Ошондуктан оорунун алгачкы белгилери байкалганда эле ооруканага кайрылып, медициналык кеңештерди, көрсөтмөлөрдү алыңыздар. Эрте кайрылсаңыздар оорудан айыкканга мүмкүнчүлүк чоң болот.

Ооруну жашыруунун кажети жок, бул баарыбыздын башыбызга бирдей келген маселе болуп жатат", - дейт Боронов.