Дүйшөнбек Зилалиевге карата козголгон кылмыш ишин кароо кайрадан жылдырылды

Бишкек шаарынын Биринчи Май райондук сотунун өндүрүшүндө Дүйшөнбек Зилалиевге карата козголгон кылмыш ишин кароо кайрадан жылдырылды. Бул тууралуу мекеменин басма сөз кызматынан билдиришти.

Бүгүнкү соттук териштирүү айыпталуучу Дүйшөнбек Зилалиевдин жактоочуларынын келбегендигине байланыштуу жылдырылды. Кийинки соттук отурум 2020-жылдын 2-октябрь күнүнө саат 14:00гө белгиленди" , - деп жазылат маалыматта.

Эске салсак, кечээ, 30-сентябрда дагы Биринчи Май райондук сотунун өндүрүшүндө Дүйшөнбек Зилалиевге карата козголгон кылмыш ишин кароо, айыпталуучунун ооруп жатканына байланыштуу жылдырылган.

Окуянын чоо-жайы:

2018-жылы УКМК Зилалиевдин декларацияга киргизилбеген кыймылсыз мүлктөрү, банктык эсеби бар экенин аныктаганы тууралуу маалымат тараткан. 2019-жылы ага карата Башкы прокуратура тарабынан Кылмыш-жаза кодексинин "жооптуу кызматты ээлеген кызматкердин мыйзамсыз баюусу" беренеси боюнча кылмыш иши козголгон.

Дүйшөнбек Зилалиев 2010-жылдан 2017-жылга чейин төмөндөгү мамлекеттик кызматтарды ээлеген:

• Коргоо кеңешинин катчылыгынын катчысынын орун басары;
• Геология жана минералдык ресурстар боюнча агенттиктин башчысы;
• Өнөр жай, энергетика жана кен пайдалануу боюнча комитеттин төрагасы;
• Вице-премьер-министр;
• Мамлекеттик мүлктү башкаруу фондунун төрагасы кызматтарын ээлеген.